樂樂冰室

話說上水新祥街間耶耶摺埋咗之後，就開咗呢間樂樂冰室，新裝修完間隔都幾闊落，感覺算係幾開揚。同一條街上面都多咗間米線、燒味鋪同埋成記車仔麵(住北區一定知呢間野啦)。

坐底望下張餐牌↓

一眼睇晒，選擇唔多，我腦裡面即時飄咗一句出嚟：呢間嘢做唔做得長咖？

因為我有主婦手嘅關係，見親D蝦呀蟹呀蛋呀牛呀都唔可以食，最慘嘅係以上嘅野都係好鬼死鐘意，有時忍唔到口嘅下場係隻右手痕足成晚，係床上面輾轉反側典呀典呀典呀，算啦，見你係新鋪我都要忍痕捨命陪君子，做30分鐘勇者。

叫咗個午餐：鮮牛意粉 + 炒解奶滑蛋伴火腿 + 多士 + 茶走 ↓ $26 (冇影到意粉)

個多士咁擺法都相當之優皮。

起初見到餐牌得咁少嘢我期望都幾大，通常好有料嘅食店賣嘅嘢都唔會好多，以保證招牌食物嘅質素。

食落得多士做得比較好，牛油香濃多士烘得剛剛好，而其他嘅水平就一般般，甚至快餐店都做得好過佢。(我唔知應唔應該讚佢有煎塊火腿，個情況似香港應該一早有普選，但亞爺話煎住一邊比你先一樣。)

鮮牛肉意粉方面印象就唔算好深刻，做到牛咪又係牛意粉咪又係意粉嘅效果，試下個湯底，嗯...味精，感覺多親切。其實唔想同廣城比，但係又要叫冰室又要賣牛通，咁冇辦法咖，我淨係食過兩次廣城(因為成日都好多人唔想等)嘅鮮牛通，牛肉又鮮又嫩，湯底香濃通粉彈牙，實力相差得太遠吧。

記得有人講過，要知一間食店煮出嚟嘅食物有冇水準，就要睇下老闆係樓面多定係廚房多，我埋完單出門口別個頭，見到個老闆同佢d朋友吹緊水...